1. नाहक कोशिश (पंचतंत्र-मित्र भेद)

 उदारवादी सोच अपना कर अपनी भाषा को समृद्ध करें

हिमाचल प्रदेश सरकार की वेबसाइट के अनुसार, “कांगड़ी (देवनागरी) उत्तरी भारत में बोली जाने वाली एक इंडो-आर्यन बोली है, जो मुख्य रूप से कांगड़ा, हमीरपुर, बिलासपुर, ऊना जिलों और हिमाचल प्रदेश के मंडी, चंबा और कुल्लू जिले के बड़े हिस्सों और पंजाब राज्य के पठानकोट, गुरदासपुर और होशियारपुर जिलों में बोली जाती है। यह कांगड़ा घाटी के लोगों से जुड़ी हुई है। कांगड़ी डोगरी और पंजाबी भाषाओं का मिश्रण है। इसे टांकरी लिपि में लिखा जाता था।”

काँगड़ी बोली एक संपूर्ण भाषा होने के सभी मानकों पर खरी उतरती है।  

काँगड़ी भाषा निःसन्देह सर्वगुण संपन्न भाषा है, परन्तु इसमें कभी-कभी बात को सही ढंग में कहने के लिए शब्दों की कमी खलती है।  विशेषकर जब आप दूसरी भाषाओं के लेखों का काँगड़ी में अनुवाद करते हैं तो उसमें व्यक्त सभी भावों का सही अनुवाद करने के लिए काँगड़ी में शब्द नहीं मिलते हैं।  इस कमी को दूसरी भाषाओं से शब्द लेकर पूरा करने के लिए उदारवादी सोच अपनानी  होगी।

हाजिर है 'पंचतंत्र' की एक और कहानी का काँगड़ी में अनुवाद।

पंचतंत्र दियाँ कथाँ

1.  नाहक कोशिश 

दूजे दे कम्म च दखल देणां बेवकूफी हौंदी है।

     “इक ग्राँयें दे नेडैं, जंगल दिया हदा उप्पर, मंदर बणां दा था।  तित्थू दे कारीगर दोपहराँ दे वक्त खाँणे ताँईं ग्राँयें च आयी जाँदे थे।      

इक दिन सैह् जाह्लू ग्राँयें च आह्यो थे ताँ बाँदराँ दा इक झुंड, एत्थू-औत्थू घुमदा, तित्थू आयी रिहा जित्थू कारीगिराँ दा कम्म चलेह्या था।  कारीगर तिस वक्त तित्थू नीं थे।  बाँदर इत्थू-उत्थू कुदणा कन्नैंं खेलणा लगी पै।

तित्थू इक कारीगर शहतीर जो अद्धा चीरने ते बाद तिस च इक कीला फसायी गिह्या था। इक बाँदरे जो जाणनें दी एह् ताँह्ग हौयी कि एह् कीला कजो फसेह्या  है।  ताह्लू अद्धचीरे शहतीरे उप्पर बैठी सैह् अपणेयाँ दूंही हत्थाँ कन्नैंं कीले जो बाहर खिंजणा लग्गा।  कीला बड़िया मजबूतिया नैंं तित्थू गडेह्या था इस करी नैंं बाहर नीं निकळेया।  अपर बाँदर भी हठी था, सैह् सारा जोर लगाई नैंं कीले जो बाहर खिंजणे च जुटी गिया।

    अंत च भारी झटके कन्नैं सैह् कीला निकळी आयी अपर तिसदे निकळदेयाँ ही बाँदरे दा पिछला पासा शहतीरे दे चीरेह्यो दूंहीं हिस्सेयाँ दे बिच आयी करी पिचकी गिया।  बदनसीब बाँदर तड़फी-तड़फी नैंं मरी गिया।

     इस ताँईं मैं बोलदा कि असाँ जो दूजे देयाँ कम्माँ च दखल नीं देणा चाहीदा।  असाँ जो शेरे दे भोजनें ते बचेह्या-खुचेह्या ताँ मिली ही जाँदा है, होरनाँ गल्लाँ दा फिकर कजो करना?”

     दमनक बोल्या, “करटक! तिज्जो ताँ बस बचे-खुचे खाणे दी फिकर रैंह्दी।  मालिक दी भलाई दी ताँ तिज्जो परुआह ही नीं।”

     करटक - “म्हारी हित चिन्ता ते क्या हौंणा? म्हारी गिणती तिसदे खास मददगाराँ च ताँ है ही नीं।  बिण पुच्छे सलाह देणा बेवकूफी है। इस ते बेइज्जती दे इलावा किछ नीं मिलदा।”

     दमनक - “खास-आम दी गल्ल छड्ड।  जेह्ड़ा भी मालिक दी सिऔआ करह्गा तिस खास बणी जाणा।  जेह्ड़ा सिऔआ नीं करह्गा, तिन्नी खास औद्धे ते भी टिरी जाणा।  राजा, जणास कनैंं बेल दा दस्तूर है कि सैह् नेडैं रैंह्णे वाळे जो अपणा बणांदे हन्न।”

     करटक - “ताँ क्या-क्या कित्ता जाये? तेरा मतलब क्या है साफ-साफ ग्लायी दे।”

     दमनक - “अज्ज म्हारा मालिक बहोत डरेह्या है।  तिसदे डर दी वजह दा पता करी नैंं संधि (जोड़ना), विग्रह (तोड़ना), आसन (घेरना), संश्रय (सहारा लैंणा/देणा), द्वैधीभाव (दो हिस्से करना), बगैरा उपायाँ ते असाँ डर दूर करने दी सलाह दिंह्गे।”

     करटक - “तिज्जो किंञा पता कि मालिक डरेह्या है?”

     दमनक - “एह् जाँणना कोई मुश्किल कम्म नीं है।  मन दे भाव छिप्पेयो नीं रैंह्दे। सैह् चेहरे ते, इशारेयाँ ते, कोशिश ते, बोलणे दे तरीके ते, हाखीं दियाँ भीफड़ियाँ ते सब्भ दे साह्म्णे आयी जाँदे हन्न।  अज्ज म्हारा मालिक डरेह्या है।  असाँ तिसदे डर जो दूर करी नैंं तिस्सेयो अपणे वश च करी सकदे हन्न। ताहलू तिस असाँ जो अपणा प्रधान सचिव बणायी लैंणा।”

     करटक - “तू समाज सेवा दे उसूलाँ जो नीं जाणदा, मालिक जो अपणे वश च किंञा करह्गा?”

     दमनक - “मैं ताँ बचपण च ही अपणे बापुये कन्नैं खेलदे-खेलदे राज-सिऔआ दा पाठ पढ़ी लिया था।  राज-सिऔआ खुद इक कला है।  मैं तिस कला च माहिर है।”

     एह् बोली करी दमनकैं राज-सिऔआ देयाँ दस्तूराँ दी जाणकारी दित्ती।  राजा जो संतुष्ट करने कनैंं तिसदी नजराँ च आदर पांणे दे कई उपाय दस्से।  करटक दमनक दी चतुराई जो दिक्खी नैंं हैराण रही गिया।  तिन्नी भी तिसदी गल्ल मन्नी लई कनैंं दोह्यो राजसभा  बक्खी चली पै।

     दमनक जो औंदा दिक्खी नैंं पिंगलक (शेर) द्वारपाले जो बोलेया, “असाँ दे पराणे मंत्री दा पुत्र दमनक औआ दा है, तिस्सेयो असाँ व्ह्ली बेरोकटोक औंणा दिया।”

     दमनक राजसभा च आयी नैंं पिंगलक जो प्रणाम करी नैंं अपणिया जगह पर बैठी गिया। पिंगलक अपणा सज्जा हत्थ उप्पर करी दमनक दा हालचाल पुच्छणा लग्गा, “बोल दमनक! सब्भ ठीक-ठाक ताँ है? मतेयाँ दिनाँ परंत आये! कोई खास वजह है क्या?

     दमनक - “खास वजह ताँ कोई भी नीं। फिरी भी सेवक जो सुआमी दी भलाई दी गल्ल करने ताँईं अप्पु औंणा चाहीदा।  राजे व्ह्ली उत्तम, मध्यम, अधम, सारियाँ किसमाँ दे सेवक हन्न।  राजा ताँईं सारेयाँ दा इस्तेमाल है।  समै पर कक्खे दा भी सहारा लैंणा पोंदा है, सेवक दी ताँ गल्ल ही क्या है!”

     तुसाँ  बहोत दिनाँ परंत औंणे दा ळाह्मा दित्ता। इसदी भी वजह है।  जित्थू काँच दिया जगह मणि कनैंं मणि दिया जगह काँच जड़ेह्या जाए तित्थू भले सेवक नीं ठहरदे। जित्थू पारखी नीं तित्थू रत्नाँ दा मुल नीं लगदा।  सुआमी कनैंं सेवक इक दूजे पर डिपेंड हौंदे हन्न। तिन्हाँ जो इक दूजे दा आदर करना चाहीदा।  राजा ताँ राजी हौयी नैंं सेवक जो सिर्फ सन्मान दिंदे हन्न, अपर सेवक संतुष्ट हौयी नैंं राजा ताँईं अपणे प्राँणां दी वळि देई दिंदा है।

     पिंगलक दमनक दियाँ गल्लाँ ते खुश हौयी करी बोल्या, “तू ताँ म्हारे पैह्लकणैं मंत्रिये दा पुत्र है इस ताँईं तू जे ग्लाणा है बेफिक्र हौयी नैंं ग्लाह्।”

     दमनक - “मैं सुआमी कन्नैंं किह्लेयाँ किछ ग्लाणा चाँह्दा।  चार कन्नाँ च ही भेत दी गल्ल गुप्त रही सकदी है, छे कन्ना च कोई भेत गुप्त नीं रही सकदा।”

     ताह्ली पिंगलकैं इशारे नैंं बाघ, रिच्छ, चीते, बगैरा सब्भ जानवराँ जो सभा ते बाहर भेजी दित्ता।  सभा च एकाँत हौंणे ते परंत दमनकैं शेरे दे कन्नाँ दे नेडैं जाई नैंं सुआल कित्ता :

     दमनक - “जाह्लू तुसाँ पाँणी पींणां गैह्यो थे ताह्लू पाँणी पींणे बाह्जी कजो मुड़ी आये थे? इसदी क्या वजह थी?”

     पिंगलकैं जरा सुक्की हंसी हंसदे हौंयें जवाब दित्ता,  “किछ भी नीं।”

     दमनक - “महाराज! जेकर सैह् गल्ल ग्लाणे जोगी नीं है ताँ रैंह्णा दिया। सारियाँ गल्लाँ ग्लाणे जोगी नीं हौंदियाँ।  किछ गल्लाँ अपणिया जणासा ते भी छुपाणे लायक हौंदियाँ हन्न।  किछ पुत्राँ ते भी छुपाइयाँ जाँदियाँ हन्न।  बहोत जोर देणे पर भी सैह् गल्लाँ नीं गलोंदियाँ।”

     पिंगलकैं सोच्या, एह् दमनक समझदार लगदा है; इस्सेयो अपणे मनेंं दी गल्ल कैंह् नी दस्सी दित्ती जाए - एह् सोची नैंं सैह् बोलणा लग्गा :

     पिंगलक - “दूर ते जेह्ड़ी एह् हुंकार दी उआज औआ दी, तिसा जो तुसाँ सुणा दे?”

     दमनक - “सुणा दा सुआमी! तिस ते क्या हौया?”

     पिंगलक - “दमनक! मैं इस बणें ते चले जाणे दी गल्ल सोचा दा।”

     दमनक - “कजो भगवन्?”

     पिंगलक - “इस ताँईं कि इस बणें च कोई होर तगड़ा जानवर आयी गिह्या है, तिसदी ही एह् डरौणी घोर गर्जना है।  अपणिया उआजा साँहीं सैह् अप्पु भी इतणा ही डरौणा हौंगा।  तिसदी ताकत भी डरौणी हौंगी।”

     दमनक - “सुआमी! ऊंची उआज मात्र ते डरना सही नीं है।  ऊंची उआज कई किसमा दी हौंदी है।  भेरी, मृदंग, पटह, शंख, काहल बगैरा कई बाजे हन्न, जिन्हाँ दी उआज बड़ी उच्ची हौंदी है।  तिन्हाँ दे कुण डरदा है? एह् बण तुसाँ दे पुरखाँ दे टैमे दा है।  सैह् एत्थू राज करदे थे।  इस्सेयो इस तरहाँ छड्डी करी जाणा ठीक नीं। ढोल भी कितणे जोरे नैंं बजदा है।  गोमायु जो तिसदे अंदर जाई नैंं ही पता लग्गेया था कि सैह् अंदरा ते खाली था।”

     पिंगलक बोलणा लग्गा, “गोमायु दी कहाणी कदेही है?”

     ताह्लू दमनक बोल्या, “ध्यान देई नैंं सुणा —”

(अग्गैं अगलिया कड़िया च)