2. ढोले दी पोल (पंचतंत्र-मित्रभेद)

 

पंचतंत्र दियाँ कथाँ

2.  ढोले दी पोल

उआज मात्र ते डरना सही नीं हौंदा।

गोमायु नाँ दा गिद्दड़ इक बरी भुक्खा-प्यासा जंगले च घुमा दा था।  घुमदा-घुमदा सैह् इक जुद्धभूमि च जाई रिहा।  तित्थू दो फौजाँ दा जुद्ध हौयी नैंं शांत हौयी गिह्या था।  अपर इक ढोल अतिह्यैं तित्थू ही पिह्या था।  तिस ढोले पर अक्खे-बक्खे दियाँ बेलाँ दे डाळू हौआ कन्नैंं हिली नैंं चोट करा दे थे।  तिन्हाँ चोटां नैंं ढोले ते बड़े जोरे दी उआज औआ दी थी।

     उआज सुणी करी गोमायु बहोत डरी गिया।  तिन्नी सोच्या, इसते पैह्लैं कि एह् डरौणी उआज वाळा जानवर मिंजो दिक्खे,  मैं एत्थू ते नह्ठी जाँदा।  अपर दूजे ही क्षण तिस्सेयो याद आया कि डर कनैंं खुशी दे जोश च असाँ जो चाणचक कोई कम्म नीं करना चाहीदा।  पैहलैं  डर दी वजह दा पता करना चाहीदा। एह् सोची नैंं सैह् हौळैं-हौळैं तिस पासैं चली पिया जित्थु ते उआज औआ दी थी।  उआज दे नेडैं जाई नैंं तिस्सेयो ढोल सुज्झेया।  ढोले पर बेलाँ दे डाळू चोट करा दे थे।  गोमायु खुद तिस पर हत्थ मारना लग्गेया।  ढोल होर भी जोरे नैंं बजी उट्ठेया।

     गिद्दड़ैं सोच्या एह् जानवर ताँ बड़ा सिद्धा-सादा लगदा है।  इसदा शरीर भी बहोत बड़ा है।  माँसळ भी है।  इस्सेयो खायी नैंं कई दिनाँ दी भुक्ख मिटी जाँणी है।  इस च चर्बी, माँस, खून खूब हौंगा। एह् सोची नैंं तिन्नी ढोल दे उप्पर लग्गेह्यो चमड़े च दंद चुभायी दित्ते।  चमड़ा बड़ा सख्त था, गिद्दड़े दे दो दंद टुटी गै।  बड़ियाँ मुश्किलाँ नैंं ढोल च इक छींडा पिया।  तिस छींडे जो चौड़ा करी नैंं गोमायु जाह्लू ढोले अंदर घुसड़ेया ताँ एह् दिक्खी नैंं निराश हौया कि सैह् ताँ अंदरा ते कतई खाली है, तिस च रक्त-माँस-मज्जा थे ही नीं।

     इस ताँईं मैं ग्लाँदा कि उआज मात्र ते डरना ठीक नीं।

     पिंगलक बोल्या, “मेरे सारे साथी तिस उआज ते डरी नैंं जंगल ते नह्ठणे दी स्कीम बणाह्दे। तिन्हाँ जो कुस तरहाँ धीरज बद्धाऊं?”

     दमनक - “इस च इन्हाँ दा क्या कसूर?  सेवक ताँ सुआमी दी देखा-देखी नकल करदे हन्न।  जदेहा सुआमी हौंगा तदेहे ही तिसदे सेवक हौंणे।  एह् दुनिया दी रीत है।  तुसाँ किछ वक्त तिकर तसल्ली रक्खा कनैंं हौंसले नैंं कम्म लिया।  मैं तौळा ही तिस उआज दी सूरत दिक्खी नैंं औंह्गा।”

     पिंगलक - “तू तित्थू जाँणे दा हौंसला किंञा करह्गा।”

     दमनक - “सुआमी दे हुक्म दा पालन करना ही सेवक दा कम्म है।”

     सुआमी दा हुक्म होये ताँ अग्गी च कुद्दी जाँ, समुद्रे च छाळ मारी दियाँ।

     पिंगलक - “दमनक! जाह् इस उआज दा पता लगाह्।  तेरा रस्ता कल्याणकरी होये, एही मेरा आशीर्वाद है।”

     ताह्ली दमनक पिंगलक जो प्रणाम करी नैंं संजीवक दी उआज जो अपणा मकसद बणायी करी तिस पासे बक्खी चली पिया।

     दमनक दे जाणे ते बाद पिंगलकैं सोच्या - एह् गल्ल ठीक नीं हौयी कि मैं दमनक दा विशुआस करी नैंं तिसदे साह्म्णे अपणे मनें दा भेत खोली दित्ता।  कुतह्की सैह् इसदा फायदा ठुआयी नैंं दूजे पासैं मिली जाए कनैंं तिस्सेयो मिंजो पर हमला करने ताँईं उकसाये ताँ बुरा हौंणा। मिंजो दमनके उप्पर भरोसा नीं करना चाहीदा था।  सैह् बर्खास्त हौया है, तिसदा बापू मेरा प्रधानमंत्री था।  इक बार सन्मानित हौयी नैंं अपमानित हौयो सेवक भरोसे लायक नीं हौंदे।  सैह् अपणिया बेइज्जतिया दा बदला लैंणे दा मौका तोपदे रैंह्दे हन्न।  इस ताँईं कुसी दूजिया जगह जाई नैंं दमनक दी निहाळ करदा।

     एह् सोची करी सैह् दमनक दी राह दिक्खदा होया दूजिया जगह पर चली गिया।

     दमनक जाह्लू संजीवक दी उआज दा पिच्छा करदा होया तिस व्ह्ली पौंह्चेया ताँ एह् दिक्खी करी तिस्सेयो खुशी हौयी कि सैह् कोई डरौणा जानवर नी बल्कि सिद्धा-सादा बळ्द है।  तिन्नी सोच्या, हुण मैं जोड़-तोड़ (संधि-विग्रह) दी कूटनीति कन्नैंं पिंगलक जो जरूर अपणे वश च करी लैंणा।  मुसीबत च फसेया राजा ही  बजीराँ दे वश च हौंदा है।

     एह् सोची नैंं सैह् पिंगलके कन्नैंं मिलणे ताँईं वापस मुड़ी आया।

     पिंगलकैं तिस्सेयो किह्ला औंदा दिक्खेया ताँ  तिसदे काळजे च ठंड पई।  सैह् बोल्या, “दमनक, सैह् जानवर दिक्खी लिया तैं?”

     दमनक - “तुसाँ दिया दया ते दिक्खेया सुआमी!”

     पिंगलक - “सचमुच?”

     दमनक - “सुआमी दे साह्म्णे झूठ नीं बोली सकदा मैं।  तुसाँ दी ताँ मैं देवता साँहीं पूजा करदा। तुसाँ कन्नैंं झूठ किंञा बोली सकदा?”

     पिंगलक - “मुमकिन है तैं दिक्खेह्या हौये, इस च हैरानी क्या?  कनैंं इस च अचरज भी नीं कि तिन्नी तिज्जो नीं मारेया।  बड्डे माह्णू बड्डे दुश्मण पर अपणा जोर अजमाँदे हन्न, गरीब कन्नैंं तुच्छ माह्णुयें पर नीं।  तूफान दा झलारा बड्डे रुक्खाँ जो ही गिराँदा है, घाह्-पतराह् जो नीं।”

     दमनक - “मैं दीन ही सही, अपर तुसाँ दी इजाजत हौये ताँ मैं तिस महान पशु जो भी तुसाँ दा सेवक बणायी दूं।”

     पिंगलक लम्मा साह लई नैंं बोल्या, “एह् किंञा हौयी सकह्गा दमनक?”

     दमनक - “अक्ल दे जोरे ते सब्भ किछ हौयी सकदा है सुआमी!  जिस कम्मेयो बड्डे-बड्डे हथियार नीं करी सकदे तिस कम्म जो निक्की जेही बुद्धि करी सकदी है।”

     पिंगलक - “जेकर एही गल्ल है ताँ मैं तिज्जो अज्जा ते अपणा प्रधानमंत्री बणांदा।  अज्ज ते मेरे राज च इनाम बंडणे जाँ दण्ड देणे दे कम्म तेरे ही अंडर हौंगे।”

     पिगलक ते एह् दिलासा पांणे दे परंत दमनक संजीवक व्ह्ली जाई नैंं अकड़ी करी बोल्या, “अरे दुष्ट बैल! मेरा सुआमी पिंगलक तिज्जो सद्दा दा। तू एत्थू नदिया दे कंह्ड़े बेकार ही हुंकाराँ कजो भरदा रैंह्दा?”

     संजीवक - “एह् पिंगलक कुण?”

     दमनक - “अरे! पिंगलके जो नीं जाणदा? जरा कि ठहर ताँ तिज्जो तिस दिया ताकता दा पता चली जाणा।  जंगल दे सब्भ जानवराँ दा सुआमी पिंगलक शेर औत्थू रुक्खे दिया छाउंआँ बैठेह्या है।”

     एह् सुणी करी संजीवक दे प्राण सुक्की गै।  दमनक दे साह्म्णे गिड़गिड़ांदा हौया बोल्या, “मित्र! तू सज्जण लगदा है। जेकर तू मिंजो तित्थू लई जाणा चाँह्दा ताँ पैहलैं सुआमी ते मिंजो ताँईं अभय-वचन लई लै।”

     दमनक - “तेरा बोलणा सही है मित्र! तू एत्थू बैठ, मैं अभय-वचन लई नैंं हुण औंदा।”

     फिरी, दमनक पिंगलक व्ह्ली जाई नैंं बोल्या, “सुआमी! सैह् कोई मामूली जीव नीं है।  सैह् ताँ भगवान दी सुआरी बैल है।  मेरे पुच्छणे पर तिन्नी मिंजो दस्सेया कि तिस्सेयो भगवानैंं खुश हौयी करी जमुना दे कंह्डे सैला-सैला घाह् खाणे जो एत्थू भेज्या है।  सैह् ताँ ग्लाँदा है कि भगवानैंं तिस्सयो एह् सारा बण खेलणे कनैंं चरने ताँईं देई दित्तेह्या है।”

     पिंगलक - “सच बोला दे दमनक!  भगवान दे आशीर्वाद बगैर कुण बळ्द है जेह्ड़ा एत्थू इस बण च निडर हौयी नैंं घुमी सके!  फिरी तैं क्या जवाब दित्ता दमनक?”

     दमनक - “मैं तिस्सेयो ग्लाया कि इस बण च ताँ चंडी दी सुआरी दे रूप च शेर पिंगलक पैहले ते ही रैंह्दा है। तुसाँ भी तिसदे प्रौह्णे बणी नैंं रिहा। तिस कन्नैंं मजे नैंं घुम्मा-फिरा। तिस तुसाँ दा सुआगत करना है।”

     पिंगलक - “फिरी तिन्नी क्या ग्लाया?”

     दमनक - “तिन्नी एह् गल्ल मन्नी लई कनैंं ग्लाया कि अपणे सुआमी ते अभय-वचन लई औआ, मैं तुसाँ कन्नैंं चलह्गा। हुण सुआमी जदेहा चाँह्गे, तदेहा करह्गा।”

     दमनक दी गल्ल सुणी नैंं पिंगलक बहोत खुश हौयी नैंं बोल्या, “बहोत बद्धिया ग्लाया दमनक, तैं बहोत बद्धिया ग्लाया।  मेरे दिले दी गल्ल ग्लायी ती।  हुण तिस्सेयो अभय-वचन देई करी तौळे ही मिंजो व्ह्ली लई औआ।”

     दमनक संजीवक व्ह्ली जाँदा-जाँदा सोचणा लग्गेया - सुआमी अज्ज बहोत खुश है। गल्लाँ ही गल्लाँ च मैं तिस्सेयो खुश करी लिया।  अज्ज मिंजो ते ज्यादा धनभाग कोई नीं।

     संजीवक व्ह्ली जाई नैंं दमनक आदरे नैंं बोल्या, “दोस्त! मेरे सुआमियें तुसाँ जो अभय-वचन देई दित्तेह्या है, मिंजो कन्नैंं आयी जा।  अपर राज महल च जाई नैंं घमंडी मत हौयी जाणा, मिंजो कन्नैंं दोस्ती दा रिस्ता निभाणा।  मैं भी तुसाँ दे इशारे पर राज चलाँह्गा।  असाँ दोह्यो मिली करी राज-लक्ष्मी दा भोग करह्गे।”

     दोह्यो मिली नैंं पिंगलक व्ह्ली गै।  पिंगलकैं नौहराँ नैंं सज्जेया सज्जा हत्थ ठुआई नैंं संजीवक दा सुआगत कित्ता कनैंं ग्लाया, “कल्याण होये तुसाँ दा।  तुसाँ इस निर्जन बणें च किंञा आयी गै?”

     संजीवकैं सारा हाल सुणाइता। पिंगलकैं सब्भ सुणी नैंं ग्लाया, “दोस्त, डर मत।  इस बणें च मेरा ही राज है। मेरे बाजुआँ दिया हिफाजता च इस बणें च तुसाँ दा कोई बाळ भी बाँका नी करी सकदा।  फिरी भी, भला इस च ही है कि तुसाँ हर वक्त मिंजो कन्नैंं रिहा।  बणें च कई डरौणे पशु रैंह्दे हन्न। बड़े-बड़े खूंखार बणवासियाँ जो भी डरी करी रैंह्णा पौंदा है, तुसाँ ताँ फिरी हन्न ही माँस नीं खाणे वाळे।”

     शेरे कनैंं बैले दिया इसा दोस्तिया ते परंत किछ दिन ताँ करटक-दमनक ही बणे दा राज चलाँदे रैह्, अपर बाद च संजीवक दे साथ कन्नैंं पिंगलक भी नगर दी सभ्यता नैंं वाकम हौयी गिया। संजीवक जो सभ्य जीव मन्नी करी सैह् तिसदा आदर करना लगी पिया कनैंं अप्पु भी सभ्य हौंणे दा जतन करना लग्गेया।  थोड़े दिनाँ बाद संजीवक दा असर पिंगलक पर इतणा बद्धी गिया कि पिंगलक होरना बण जीवां जो नजरअंदाज करना लगी पिया। हर मामले च पिंगलक संजीवक कन्नैंं एकाँत च सलाह-मशवरा करदा।  करटक-दमनक बिच दखल नीं देई पाँदे थे।  संजीवक दी इज्जत बद्धणे ते दमनक दे मनें च अग्ग लगी गयी।

     शेर कनैंं बैल‌ दी इस दोस्ती दा इक बुरा नतीजा एह् भी होया कि शेरैं शिकार दे कम्म च ढील करी ती।  करटक-दमनक शेर दा बचेह्या मास खायी नैंं ही जींदे थे।  हुण सैह् घुल्लेया मास बहोत घटी गिह्या था।  इस ते करटक-दमनक भुक्खे रैंह्णा लग्गे।  ताह्लू  सैह् दोह्यो इसदा हल सोचणा लग्गे।

     दमनक बोल्या, “करटक भाई! एह् ताँ अनर्थ हौयी गिया।  शेरे दियाँ नजराँ च बड़ाई पाणे ताँईं ही ताँ मैं एह् प्रपंच रच्चेह्या था।  इस ताँईं मैं संजीवक जो शेरे नैंं मिलाया था।  हुण तिसदा नतीजा बिल्कुल उळ्टा ही हौआ दा।  संजीवक जो पायी नैंं सुआमियें असाँ जो कतई बिसारी दित्तेह्या है।  एत्थू तिकर कि अपणा कम्म भी सैह् भुली गिह्या है।”

     करटकैं ग्लाया, “अपर इस च गलती कुस दी है? तैं ही दूंहीं दी मुलाकात करुआयी थी। हुण तू ही कोई जतन कर, जिसते इन्हाँ दूंहीं च बैर हौयी जाए।”

     दमनक - “जिन्नी मेल करुआह्या है, सैह् फूट भी पायी सकदा है।”

     करटक -”जेकर इन्हाँ च कुसी जो भी पता चली गिया कि तू फूट पांणा चाँह्दा है, ताँ तेरी खैर नीं।”

     दमनक - “मैं इतणा कच्चा खिलाड़ी नीं है। सारे दांव-पेच जाँणदा।”

     करटक - “मिंजो ताँ फिरी भी डर लग्गेह्या।  संजीवक समझदार है, तिन्नी देहा नीं हौंणा देणा।”

     दमनक - “भाऊ! मेरिया बुद्धिया दी चतुराइया सब्भ करायी देणा। बुद्धिया दिया ताकता कन्नैंं नामुमकिन भी मुमकिन हौयी जाँदा है।  जेह्ड़ा कम्म शस्त्रास्त्राँ ते नीं हौयी पाँदा सैह् बुद्धिया नैंं हौयी जाँदा है, जिंञा सूने दिया माळा कन्नैंं कौये दियें घरेवाळियें काळे सर्प जो मारेया था।”

     करटकैं पुच्छेया, “सैह् किंञा?”

    दमनकैं ताहली सर्प कनैंं कौये दी कहाणी सुणायी —

(अग्गैं अगलिया कड़िया च)