3. अक्ल बड़ी जाँ म्हैं कनै बगुला भगत (पंचतंत्र-मित्र भेद)

 

पंचतंत्र दियाँ कथाँ

3.   अक्ल बड़ी जाँ म्हैं

तरकीब लगायी नैंं जेह्ड़ा कम्म हौयी जाँदा सैह् ताकता नैंं नीं हौयी पाँदा है।

     इक जगह बड़ दे दरख्ते दे इक बड़े ढोढ़ च इक कौवा-कौवी रैंह्दे थे।  तिस ही ढोढ़  दे बक्खैं इक काळा सर्प भी रैंह्दा था। सैह् सर्प कौवी दे निक्के-निक्के बच्चेयाँ जो तिन्हाँ दे फर निकळनें ते पैहलैं ही खायी जाँदा था।  दोह्यो इसते बहोत दुःखी थे।  आखिर च दूंहीं अपणी दुःख भरी कथा तिस रुक्खे दे थल्लैं रैह्णे वाळे इक गिद्दड़े जो सुणायी, कनैंं तिसते एह् भी पुच्छेया कि क्या कित्ता जाये।  सर्पे वाळे घरे च रैंह्णा जानलेवा हौंदा है।

     गिद्दड़ैं ग्लाया, “इसदा उपाय चतुराइया नैंं ही हौयी सकदा है।  तरकीब  लगायी नैंं दुश्मणें पर जित्त पाणा बड़ा सौखा हौंदा है।  इक बरी इक बगुला बहोत सारी उत्तम, मध्यम, अधम मच्छियाँ जो खायी करी ळाळचवश इक केकड़े दे हत्थाँ तरकीबा कन्नैंं ही मारेया गिया था।

     दूंहीं पुच्छेया, “किंञा?”

     ताह्लू गिद्दड़ बोल्या, “सुणा —”

4. बगुला भगत

तरकीब कन्नैंं दुश्मण जो जित्ता, हथियार कन्नैंं नीं।

     इक जंगल च बहोत सारी मच्छियाँ नैंं भरोह्या इक तळा था।  इक बगुला तित्थू हर रोज मच्छियाँ खाणे ताँईं औंदा था, अपर बुड्ढा हौंणे दिया वजह ते मच्छियाँ जो पकड़ी नीं पाँदा था।  इस तरहाँ भुक्खा कन्नैंं वकळौयी नैंं सैह् इक दिन अपणे बुढ़ापे जो रौआ दा था कि इक केकड़ा तित्थू आया।  सैह् बगुले जो इकसार आँसू बहाँदे दिक्खी नैंं ग्लाणा लग्गा, “मामा! अज्ज तुसाँ पैहले साँहीं मजे नैंं भोजन नीं करा दे, कनैं बैठी नैंं आँसू बगाह्दे, इसदी क्या वजह है?”

   बगुला बोल्या, “मित्र! तुसाँ ठीक गलाह्दे।  मच्छियाँ दा भोजन करी नैंं मेरा मन उकताई गिह्या।  अज्जकल अनशन करा दा।  इस वजह ते मैं नेडैं आइह्याँ मच्छियाँ जो नीं पकड़दा।

     केकड़ैं एह् सुणी कर पुच्छेया, “मामटी! इस सन्यास दी वजह क्या है?”

     बगुला - “दोस्त! गल्ल एह् है कि मैं इस तळाये च जन्म लिया, बचपणे ते ही एत्थू रिहा कनैंं एत्थू ही मेरी उम्र गुजरी। इस तळाये कनैंं तळाये दे बाशिंदेयाँ कन्नैंं मिंजो प्यार है।  अपर मैं सुणेह्याँ कि हुण बड़ा भारी अकाल पौंणे वाळा है। बारह बरिह्याँ तिकर बरखा नीं हौंणी है।”

     केकड़ा - “कुस ते सुणेह्याँ?”

     बगुला - “इक ज्योतिषी ते सुणेह्याँ। शनिचर जाह्लू अर्ध गोलाकार रोहिणी तारा मंडल जो खंडित करी नैंं शुक्रे सौगी इक राशिया च  जाँह्गा ताँ बारह बरिह्याँ तिकर बरखा नीं हौंणी है। पृथ्वी पर पाप फैली जाणा है।  माँ-पियोआँ अपणी संतान दा भक्षण करना लग्गी पौंणा है।  इस तळाये च पैहलैं ही पाणी घट है। इस तौळे ही सुक्की जाणा है।  इसदे सुक्कणे पर मेरे बचपण दे सब्भ साथी, जिन्हाँ दे बिच रही करी मैं इतणा बड्डा हया, मरी जाणे हन्न।  तिन्हाँ दे बिछौड़े दे दुःख दी सोच ते ही मैं इतणा रौआ दा।  कनैंं मैं इस ताँईं ही अनशन कित्तेह्या है।  दूजे तळां च रैह्णे वाळे प्राणी अपणे छोटे-छोटे तळां जो छड्डी करी बड्डियाँ-बड्डियाँ झीलाँ च जाह्दे हन्न।  पाणियें दे बड़े-बड़े जीव ताँ अपणे आप चली जाह्दे, छोटेयाँ ताँईं ही मुश्किल है। बदकिस्मती ते इस तळाये दे जीव बिल्कुल  बेफिक्र हौयी नैंं बैठेह्यो हन्न, जिंञा किछ हौंणे वाला ही नीं है।  तिन्हाँ ताँईं ही मैं रौआ दा।  तिन्हाँ दा वंश-नाश हौयी जाणा है।”

     केकड़ैं बगुले दे मुंह ते एह् गल्ल सुणी नैंं दूजी सब्भ मच्छियाँ जो औंणे वाळी मुसीबत दी खबर देई दित्ती।  खबर सुणी करी तळाये दे पाणी च रैह्णे वाळे सारे जीव, मच्छियाँ, कछुए बगैरा बगुले जो घेरी करी पुच्छणा लगी पै - “मामा! क्या कुसी जतनें कन्नैंं असाँ बची सकदे हन्न?”

     बगुला बोल्या, “एत्थू ते थोड़ी कि दूर काफी पाँणियें ने भरोया इक तळा है।  सैह् इतणा बड़ा है कि चौबी साल तिकर सुक्का पौंणे पर भी नीं सुक्के।  तुसाँ जेकर मेरिया पिट्ठी पर चढ़ी जाँह्गे ताँ तुसाँ जो  तित्थू जो लई चलह्गा।”

     एह् सुणी करी सब्भ मच्छियाँ, कछुआँ कनैंं दूजे जलजीवां बगुले जो ‘भाऊ’, ‘मामा’, ‘चाचा’ पुकारदे हौंयाँ चौंह् पासेयाँ ते घेरी  लिया कनैंं चिल्लाणा शुरू करी दित्ता, “पैह्लैं मिंजो, पैह्लैं मिंजो।”

     सैह् दुष्ट सब्भनाँ जो बारी-बारी अपणियाँ पिट्ठी पर बठाळी तळाये ते किछ दूर लई जाँदा कनैंं तित्थू इक सिल्ला पर फौड़ी-फौड़ी मारी दिंदा था।  तिन्हाँ जो खायी करी दूजे दिन सैह् फिरी तळाये च आयी जाँदा कनैंं नौंआँ शिकार लई जाँदा।  किछ दिन बाद केकड़ैं बगुले जो ग्लाया, “मामटी! सब्भते पैह्लैं तुसाँ कन्नैंं मेरी मुलाकात हौयी थी फिरी भी तुसाँ अज्ज तिकर मिंजो लई नैंं नीं गै।  हुण तिकर तकरीबन सारे नौंयें तळाये च जाई रैह्, अज्ज मेरा भी उद्धार करी दिया।”

     केकड़े दी गल्ल सुणी नैंं बगुलैं सोच्या, मच्छियाँ खायी-खायी मेरा मन भी ऊबी चुक्केह्या है।  केकड़े दे माँसे चटणी दा कम्म देणा। अज्ज मैं इस्सेयो ही खाणा।

     एह् सोची नैंं सैह् केकड़े जो क्याड़िया पर बठाळी करी चली पिया।

     केकड़ैं जाह्लू दूरा ते ही इक सिल्ला पर मच्छियाँ दे हड़कुआँ दा पहाड़ जेहा लग्गेह्या दिक्खेया ताँ सैह् समझी गिया कि बगुला कुस मकसदे ताँईं मच्छियाँ जो तित्थू लई औंदा था फिरी भी सैह् असली गल्ल छुपायी करी ग्लाणा लग्गा, “मामटी! सैह् तळाव कितनी कि दूर रही गिया?  मेरे भारे नैंं तुसाँ थकी गैह्यो हौंगे, इस ताँईं पुच्छा दा।”

     बगुलैं सोच्या, हुण इस कन्नैंं सच्ची गल्ल ग्लाणे दा कोई हर्ज नीं, इस ताँईं सैह् बोल्या, “केकड़ा साहब! दूजे तळाये दी गल्ल भुल्ली जा। एह् ताँ मेरी प्राणजात्रा चल्लिह्यो।  हुण तेरा भी काल आयी गिह्या।  अंत समै च अपणे देवते जो याद करी लै।  इस सिल्ला पर पटकी नैंं मैं तिज्जो मारी करी खायी लैणा है।”

     बगुला हाली तिकर एह् गल्ल करादा ही था कि केकड़ैं अपणे तेज दंद बगुले दी नरम मुलायम क्याड़िया पर गड़ाइते।  बगुला तित्थू ही मरी गिया।  तिसदी गर्दण कटोई गयी।

    केकड़ा मरेह्यो बगुले दी गर्दण लई करी हौळैं-हौळैं अपणे पराणे तळाये पर आयी गिया।  तिस्सेयो दिक्खी नैंं तिसदे भाई-बंदां तिद्दो घेरी लिया कनैंं पुच्छणा लग्गे, “क्या गल्ल है? अज्ज मामा नीं आये? असाँ सारे तिन्हाँ कन्नैंं तळाये पर जाणे जो तैयार बैठह्यो।”

     केकड़ैं हस्सी करी जवाब दित्ता, “मूर्खो! तिन्नी बगुलैं सब्भ मच्छियाँ जो एत्थू ते चुक्की नैंं इक सिल्ला पर फौड़ी नैंं मारी दित्तेह्या है।” एह् बोली करी तिन्नी अप्पु व्ह्ली ते बगुले दी कटिह्यो गर्दण दस्सी नैंं ग्लाया, “हुण फिकर करने दी कोई गल्ल नीं है, तुसाँ सब्भनाँ एत्थू मौजा नैंं रैंह्णा है।”

     गिद्दड़ैं जाह्लू एह् कथा सुणायी ताँ कौयैं पुच्छेया, “तिस बगुले साँहीं एह् सर्प भी कुसी तरहाँ मरी सकदा है?”

     गिद्दड़ - इक कम्म करा। तुसाँ नगर दे राजमहल च चली जा।  तित्थू ते राणिया दा कंठहार चुक्की नैंं सर्प दे बिले दे बक्खैं रक्खी दिया।  राजा दे सिपाहियाँ कंठहार जो तोपणा औंणा कनैंं तिन्हाँ सर्पे जो मारी देणा।

     दूजे ही दिन कौवी राजमहल दे  अन्त:पुर च जाई करी इक कंठहार चुक्की लियाई।  राजैं अपणे सिपाहियाँ जो तिस कौवी दा पिच्छा करने दा हुक्म दित्ता।  कौवियें सैह् कंठहार साँप दे बिल्ले दे बक्खैं रक्खीता।  सर्पें तिस हार जो दिक्खी करी अपणा फण फैलाइता। सिपाहियाँ सर्पे जो सौठेयाँ नैंं मारी सट्टेया कनैंं कंठहार लई लिया।

     तिस दिनें ते कौवा-कौवी दी औलाद जो कुन्नी सर्पें नीं खाअ्दा।  ताँहीं ताँ मैं ग्लाँदा तरकीब ते ही दुश्मण जो वश च करी लैणा चाहीदा।

     दमनक फिरी ग्लाणा लग्गा, “सच ताँ एह् है कि बुद्धि दा दर्जा बल ते बहोत उच्चा हौंदा है। ‌ जिस व्ह्ली अक्ल है सैही ताकतवर है।  बे-अक्ल दी ताकत भी व्यर्थ हौंदी है।  अक्लमंद बे-अक्ले जो तिस तरहाँ हरायी दिंदे जिंञा खरगोशैं शेरे जो हरायी दित्ता था।”

     करटकैं पुच्छेया, “किंञा?”

     दमनकैं ताह्लू “शेर-खरगोश दी कथा” सुणायी —

(अग्गैं अगलिया कड़िया च)